Kasuen gorakadarekin, neurri berriak indarrean

Atzoko LABI batzordeak hala erabakita, argitaratu dira indarrean sartuko diren neurri berriak. Lehendik emanda zeudenei, 400eko inzidentzia-tasa baino altuagoa duten herrietan neurri gehigarriak ezartzea gehituko zaie. Herri hauen zerrenda gaur argitaratuko da eta aurreikusi liteke Zaldibia ere herri horien artean izango dela.

Neurri zaharren eta berrien artean nagusienak bilduz, honako laburpena egin dugu lagungarri izango zaizulakoan. 

Lehendik indarrean zeuden neurriak:

• EAEren itxiera perimetrala
• Gaueko 22:00etatik goizeko 06:00etara kalean zirkulatzeko debekua
• 4 laguneko pertsonen elkartzeak gehienez
• Sektorekako neurriak: establezimenduetan, ostalaritzan, kirolean…
• Martxoaren 26tik apirilaren 9ra bitarteko egunetan, bizikideak diren pertsonen-taldeak elkartu ahal izango dira soilik espazio pribatuetan.

Neurri hauek martxoaren 9an sartu ziren indarrean, hemen duzue informazio osoa.

Neurri hauei, ordea, berriak gehituko zaizkie inzidentzia-tasa 400dik gorakoa den kasuetan. Orain artean bezela, Jaurlaritzak ez du argitu 5.000 biztanlez azpiko herrietan nola jokatuko den. Argitu dutena da, gaur argitaratuko dutela zaku horretan sartzen diren herrien zerrenda eta astelehenetik honako neurriak bete beharko dira herri horietan:

• Herri hauen itxiera perimetrala ezarriko da, beraz, ezingo da bertatik atera ez bertara sartu ere. Salbuespenak hauek izango dira:
  1. Mugakide diren eta ohiko zirkulazioa duten udalerrien arteko mugikortasuna baimenduko da, erosketak egiteko.
  2. Mugakide diren eta ohiko zirkulazioa duten udalerrien arteko mugikortasuna baimenduko da aire zabaleko jarduera fisikoa egiteko.
  3. Turismoari lotuta, 2021eko martxoaren 26a baino lehen egindako ostatu-erreserbak (gaua igarotzekoak) dituzten pertsonak, apirilaren 1etik 11ra bitarteko aldirako, beren udalerritik erreserba egin duten herrira joan ahal izango dira, udalerri bateko edo besteko intzidentzia-tasa gorabehera.

• Ostalaritzaren kasuan, itxitako herrietan honako neurri gehigarriak ezarriko dira:

           Ostalaritzako eta jatetxe-arloko establezimenduek murriztu egin beharko dute lokalen barruan jendea atenditzeko ordutegia bi ordu-tarte hauetara: 06:30etik 09:30era eta 13:00etatik 16:30era. Beraz, ordu tarte horietatik kanpo terrazetan bai, baina barnean ezingo da bezerorik egon.

• Kirolari dagokionez, zerrendako herrietan honakoak dira neurri gehigarriak:

            Barruko eremuetan egiten diren kirol-jarduerek ez dituzte 4 pertsonako taldeak gaindituko, talde profesionalen eta federatuen entrenamenduei eta lehiaketei eragiten dietenak izan ezik. Era berean, herri horietan, aldagelak eta dutxak itxi egingo dira kirol-instalazio mota guztietan, igerilekuetan izan ezik.

Itxitako herrien zerrenda astelehenero argitaratuko da www.euskadi.eus atarian eta udal webgunean ere argitaratuko dugu ohi bezala. Bi salbuespen izango dira:

• Lehen ebazpena gaur, martxoak 27, larunbata, argitaratuko da eta zerrendan dauden herrietan neurriak astelehenean sartuko dira indarrean.
• Bigarren ebazpena apirilaren 6an, jaiegunez egokitzen delako, apirilaren 7ra, asteartera atzeratuko da.

Zaldibiako kasuan, lehen esan bezala, zerrenda argitaratu arte ez da jakingo neurri hauek aplikatu beharko diren edo ez, herri txikietako irizpideak ez baititu dekretuak zehaztu. Hala ere, baiezkoa aurreikusi liteke eta hala balitz neurri hauek astelehenean sartuko lirateke eta indarrean egongo lirateke gutxienez apirilaren 7ko gauerdia arte. Egun horretan emango den ebazpenak argituko luke neurriak beste astebetez mantentzen diren edo ez.

Jarraian dituzue gaur argitaratutako dekretuaren xehetasun guztiak.